ప్రత్యేక కధనాలు

22-09-2016

అమర వీరులకు నివాళి

జమ్మూ కాశ్మీర్లోని యూరి సెక్టర్లో ఉగ్రవాదులతో జరిగిన ఎదురు కాల్పుల్లో మరణించిన అమర వీరులకు ఇచ్ఛాపురం పట్టణంలో గురువారం రాత్రి నివాళులర్పించారు. ఇటీవల జరిగిన కాల్పుల్లో 18 మంది వీర సైనికులు అమరులైన విషయం తెలిసిందే. ఈ సంఘటనపై భరత జాతి యావత్తు ఆగ్రహావేశాలు వ్యక్తపరుస్తున్న విషయం తెలిసిందే. ఉగ్రవాదులను పెంచి పోషిస్తున్న పాకిస్తాన్ చర్యలను ప్రతి ఒక్కరు ఖండిస్తున్నారు. ఈ నేపధ్యంలో స్తానిక తెలుగుదేశం పార్టీ నాయకుడు, సూపర్ బజార్ చైర్మన్ కే.శంకర్ రెడ్డి ఆధ్వర్యంలో విద్యార్దులు పట్టణంలోని బస్ స్టాండ్ జంక్షన్ వద్దకు చేరుకొని ఉగ్రవాద, పాకిస్తాన్ వ్యతిరేక నినాదాలు చేశారు. అమర వీరులకు జోహారులర్పించారు. క్రొవ్వొత్తులు వెలిగించి నివాళులర్పించారు. అనంతరం మెయిన్ రోడ్లో ఊరేగింపు నిర్వహించారు. కార్యక్రమంలో ఆటో యూనియన్ నాయకుడు యు.ఎర్రయ్య, యు.ఆనంద్, వై.సి.పి. నాయకులు ఆర్.నారాయణ, సిహెచ్.జగన్నాయకులు, ఆటో యూనియన్ సభ్యులు పాల్గొన్నారు.

17-09-2016

క్రీడల అభివృద్ధికి సమిష్టి కృషి 

క్రీడల అభివృద్ధి, క్రీడాకారుల ప్రోత్శాహానికి సమిష్టిగా కృషి చేయాలని స్థానిక ప్రముఖులు నిర్ణయించారు. తైక్వాండో యుద్ధ క్రీడలో జాతీయ స్థాయి పోటిలకు ఎంపికైన విద్యార్థిని, విద్యార్థుల అభినందన సభ ఇచ్ఛాపురం పట్టణంలోని ప్రభుత్వ జూనియర్ కళాశాలలో శనివారం నిర్వహించారు. ఈ సభలో ముఖ్య అతిధిగా పాల్గొన్న సోంపేట సీనియర్ సివిల్ జడ్జ్ ఐ.కరుణకుమార్ మాట్లాడుతూ నిబద్ధత గల సిహెచ్.దుర్గాప్రసాద్ స్తానిక విద్యార్థులకు తైక్వాండో కోచ్ గా లభించటం గర్వించదగ్గ విషయమన్నారు. చక్కటి ప్రతిభా పాటవాలు కలిగిన వ్యక్తీ శిక్షణలో విద్యార్థులు అంతర్జాతీయ స్థాయిలో రాణించాలని ఆకాంక్షించారు. తైక్వాండో శిక్షణాలయం ఏర్పాటుకు స్థలం కేటాయించాలని సూచించారు. దీనిపై తహసీల్దార్ ఎం.సురేష్ సానుకూలంగా స్పందించారు. సి.ఐ. ఎం.అవతారం మాట్లాడుతూ స్థానికంగా విరాళాలు సేఖరించి క్రీడా నిధిని ఏర్పాటు చేయాలని, దానిపై వచ్చే వడ్డీని  క్రీడల ప్రోత్సాహానికి వినియోగించాలని సూచించారు. ఆ మేరకు ప్రయత్నిస్తామన్నారు. మున్సిపల్ చైర్పెర్సన్ ఎం.రాజ్యలక్ష్మి మాట్లాడుతూ క్రీడల ప్రోత్సాహానికి తమ వంతు సేవలందిస్తామన్నారు. స్తానిక వైద్యుడు నర్తు శేషగిరి మాట్లాడుతూ తైక్వాండోలో రాణిస్తున్న కౌషల్య మహాపాత్రో అనే విద్యార్ధిని అంతర్జాతీయ పోటిలకు ఎంపిక అయినట్లయితే రూ.లక్ష మేరకైనా ఆర్ధిక సహాయం అందిస్తానని తెలిపారు.

అభినందన : గత ఆగస్ట్ 27 నుంచి 29వ తేది వరకు విజయనగరం ఇండోర్ స్టేడియంలో జరిగిన రాష్ట్ర స్థాయి తైక్వాండో పోటీలో శ్రీకాకుళం జిల్లాకు ప్రాతినిధ్యం వహించిన స్థానిక విద్యార్థులు చక్కగా రాణించారు. 14 ఏళ్లలోపు విభాగంలో పాల్గొన్న ఎ.భువనేశ్వరి, పి.సేవిత, 17 ఏళ్లలోపు విభాగంలో కౌసల్య మహాపాత్రో, జి.జ్యోతిష్ రెడ్డి, ఆర్.వాసుదేవ్ బంగారు పథకాలను సాధించి జాతీయ స్థాయి పోటిలకు ఎంపికయ్యారు. వీరిని అతిధులతోపాటు ప్రభుత్వ ఉన్నత పాఠశాల ప్రధానోపాధ్యాయుడు సత్యన్నారాయణ, వ్యయామోపాధ్యాయుల శిక్షణా సంఘం అధ్యక్షుడు కృష్ణయ్య, యువ సూర్య చారిటబుల్ ట్రస్ట్ అధ్యక్షుడు ఎం.రాంబాబు, కార్తికేయ ఫర్నిచర్స్ అధినేత పి.రాజేష్ తదితరులు అభినందించారు. రాబోయే 22 నుంచి 26వ తేదిల మధ్య పంజాబ్ రాష్ట్రంలో  17 ఏళ్లలోపు విభాగం వారికి జాతీయ స్థాయి తైక్వాండో పోటీని నిర్వహించనున్నారు. జాతీయ పోటిలో పాల్గొనేందుకు వెళ్లనున్న కౌషల్య, జ్యోతిష్, వాసుదేవ్లకు వైద్యుడు శేషగిరి రూ.5 వేలు, న్యాయమూర్తి కరుణకుమార్ రూ.2 వేలు, తహసీల్దార్ ఎం.సురేష్ రూ.2 వేలు, ఎం.రాంబాబు రూ.2 వేలు, పి.రాజేష్ రూ.2 వేలు మేరకు ఆర్ధిక సహాయం అందించారు.

13-09-2016

ఉత్తమ గణపతి మండపాలకు పురష్కారాలు

వినాయక చవితి ఉత్సవాల సందర్భంగా ఇచ్ఛాపురం పట్టణంలో ఏర్పాటు చేసిన మండపాల్లో ఉత్తమమైన వాటికి స్థానిక వినియోగదారుల సంక్షేమ సంఘం మంగళవారం పురష్కారాలు అందజేసింది. స్థానిక ఆసుపత్రి రోడ్లో ఏర్పాటు చేసిన మండపం వద్ద నిర్వహించిన కార్యక్రమంలో ముఖ్య అతిధులుగా పాల్గొన్న మున్సిపల్ కమీషనర్ పి.రవిబాబు, తహసిల్దార్ ఎం.సురేష్, పట్టణ ఇన్చార్జ్ ఎస్.ఐ. చిన్నమనాయుడు వీటిని అందించారు. డబ్బూరి వీధిలో ఏర్పాటు చేసిన అనంత పద్మనాభ గణపతి మండపానికి అత్యంత విశిష్ట పురష్కారం అందజేశారు. జగన్నాధ స్వామి కోవెల వీధిలోని కాల భైరవ గణపతి, రైల్వే స్టేషన్ రోడ్లోని బాల మురుగన్ గణపతి, ఆసుపత్రి రోడ్లోని మహాగణపతి మండపాలకు విశిష్ట పురష్కారాలు అందించారు. ఈ సందర్భంగా మట్టి గణపతి ప్రతిమలను చక్కగా రూపొ౦దించిన కళాకారులు కె.ధనుంజయ, ఎం.భైరి, చిత్రకారులు చంద్రశేఖర్, రామారావులను సత్కరించి బహుమతులు అందించారు. కార్యక్రమంలో వినియోగదారుల సంక్షేమ సంఘం కార్యదర్శి దేవేంద్ర బెహరా, నాగరాజు పాత్రో, మండపాల నిర్వాహకులు పాల్గొన్నారు.

10-09-2016

బంద్ విజయవంతం

ఆంధ్రప్రదేశ్ రాష్ట్రానికి ప్రత్యేక హోదా ప్రకటించాలని కోరుతూ శనివారం నిర్వహించిన బంద్ విజయవంతమైంది. ప్రత్యేక హోదా ఆంధ్రుల హక్కని నినదిస్తూ ప్రతిపక్ష పార్టీలు ఇచ్చిన పిలుపు మేరకు ఇచ్ఛాపురం పట్టణంలో స్వచ్చందంగా బంద్ పాటించారు. వ్యాపార సంస్థలు, దుఖాణాలు, దినవారీ బజారు పూర్తిగా బంద్ చేశారు. బస్సులు, ఆటోలు, ట్యాక్సీలు తిరగలేదు. దీంతో మెయిన్ రోడ్, వస్త్ర దుఖాణాల లైన్, రధం వీధి బోసిపోయి కనిపించాయి. బంద్ పిలుపునిచ్చిన ప్రధాన ప్రతిపక్ష పార్టి వై.సీ.పీ. నేతలు బంద్ పర్యవేక్షించేందుకు పట్టణంలోని మెయిన్ రోడ్ వద్దకు చేరుకున్న వెంటనే పోలీసులు వారిని అదుపులోనికి తీసుకున్నారు. పార్టీ నియోజకవర్గ సమన్వయకర్త, మాజీ ఎం.ఎల్.ఏ పిరియా సాయిరాజ్, పట్టణ పార్టీ అధ్యక్షుడు కె.దేవరాజుతోపాటు మిగిలిన నాయకులను పట్టణ పోలీస్ స్టేషన్కు తరలించారు. అనంతరం మున్సిపల్ చైర్ పర్సన్ పి.రాజ్యలక్ష్మి, కౌన్సిలర్ ఎం.రాజేశ్వరి అనుచరులతో నినాదాలు చేస్తూ ఉరేగింపుగా బస్ స్టాండ్ జంక్షన్కు చేరుకొని బైటాయించారు. వీరిని కూడా పోలీస్ స్టేషన్కు తరలించారు. మొత్తం 9 మందిని అరెస్ట్ చేశారు. మధ్యాహ్నం 1 గంట  తరువాత స్వంత పూచికత్తుపై విడిచిపెట్టారు. 

07-09-2016

ఆరోగ్యమే మహా భాగ్యం 

ఆరోగ్యమే మహా భాగ్యమని, దీన్ని ప్రతి ఒక్కరు గమనించాలని మున్సిపల్ ఛైర్పర్సన్ పి. రజ్యలక్ష్మి అన్నారు. పౌష్టికాహార వారోత్సవాల ముగింపు సందర్భంగా మున్సిపల్ కార్యలయ ప్రాంగణంలో పట్టణ పేదరిక నిర్మూలనా విభాగం (మెప్మా) ఆధ్వర్యంలో బుధవారం నిర్వహించిన సమావేశంలో ముఖ్య అతిధిగా పాల్గొని మాట్లాడారు. ఆ మేరకు కుటుంబ సభ్యులందరూ సమతుల పౌష్టికాహారం తీసుకోవటంతోపాటు వ్యాయామం చేయటం అలవారచుకోవాలన్నారు. ఈ సందర్భంగా నిర్వహించిన వ్యాసరచన, వక్తృత్వ, ఆరోగ్య బాలల పోటీల విజేతలకు బహుమతులు అందించారు. సాంప్రదాయ వంటకాలను ప్రదర్శించారు. కార్యక్రమంలో మెప్మా టౌన్ మిషన్ కో-ఆర్డినేటర్ ఎస్.వెంకట రత్నం, కౌన్సిలర్ ఎస్.ప్రేమకుమార్, పట్టణ మహిళా సమాఖ్య అధ్యక్షురాలు కుమారి గౌడో, ప్రధానోపాధ్యాయుడు లోకేశ్వర రావు, పి.ఆర్.పి రావికుమారి తదితరులు పాల్గొన్నారు. 

అలరించిన చిన్నారుల నృత్యాభినయం

ఇచ్చాపురంలోని శ్రీ వెంకటేశ్వర మ్యూజిక్, డ్యాన్స్ అకాడమికి చెందిన చిన్నారులు ఒడిశా, కటక్లో సర్తక్ టివి చానల్ పోటిలో తమ నృత్యాభినయంతో అలరించారు. దశావతారం చిత్రంలోని ముకుందా ముకుందా పాటను వి.మధుమిత, పి.గాయత్రి, ఎన్.శైలు, పి.లన్య, కె.రోషిణి, ఎ.శ్వేతారాని, జే.అంకిత, డి.కావ్య, ఎం.దేవిశ్రీ, ఎస్.పూజశ్రీ తమ నృత్యాభినయంతో అలరించారు. పనిమరి దెల్ల అనే సంబల్ పురి పాటకు చేసిన నృత్యం విశేషంగా ఆకట్టుకుంది. నిర్వాహక టివి చానల్ భువనేశ్వర్లో నిర్వహించబోయే పోటిలో పాల్గొనేందుకు ప్రభుత్వ ఉన్నత పాటశాలలో 9వ తరగతి చదువుతున్న కె.రోషిణి ఎంపిక కావటం పట్ల అకాడమి అధ్యక్షుడు చిన్నా గురుస్వామి, డ్యాన్స్ మాష్టర్ లక్ష్మణ కుమార్ దాస్ అభినందనలు తెలిపారు.

శక్తి, ముక్తి ప్రధాయని స్వేచ్ఛావతి అమ్మవారు 

శక్తి, ముక్తి ప్రధాయని స్వేచ్చావతి అమ్మవారు. ఆమె పేరు తలచుకొని చేపట్టే కార్యక్రమాలు తప్పకుండా విజయవంతం అవుతాయని ప్రజల నమ్మకం. కోరిన కోర్కెలు తీర్చే కల్పవల్లిగా ఆంధ్రప్రదేశ్, ఓడిస్సా, పశ్చిమ బెంగాల్ రాష్ట్రాల్లో ప్రసిద్ది. ఇలా శతాబ్దాల చరిత్ర కలిగిన అమ్మవారి జీవిత చరిత్ర ఒకసారి మననం చేసుకుందాం.

శతాబ్దాల చరిత్ర : కొన్ని వందల ఏళ్ల క్రితం అమ్మవారు ఇచ్చాపురంలో వెలిసారని ప్రచారంలో ఉంది. అప్పట్లో చిన్న పెంకుటింట్లో అమ్మవారిని మాలి కుటుంబీకులు పూజిస్తున్దేవారు. 1977వ సంవత్సరంలో సంబరాలు జరిగిన అనంతరం స్థానికులు ఆలయ అభివృద్ధి కమిటీని ఏర్పాటు చేసారు. విరాళాలు సేకరించి ఆరు ఎకరాల స్థలాన్ని సమకూర్చి అభివృద్ధి పరిచేందుకు నిర్ణయించారు. 1985-2000 సంవత్సరాల మధ్య ఆలయాన్ని సుందరంగా తీర్చిదిద్ది ప్రత్యెక భజన మందిరం, ప్రసాద విక్రయ శాల, వసతి గృహలను నిర్మించారు. మాజీ జిల్లా పరిషత్ చైర్మెన్ బి.త్రినాధరెడ్డి హయంలో జడ్పి నిధులతో ఆలయ ప్రాంగణంలో సామాజిక భవనాన్ని నిర్మించారు. నాటి నుంచి కమిటీ సేకరించిన నిధులతో అభివృద్ధి పనులు చేపడుతున్నారు.

అమ్మవారి ఉద్భవం : నవాబుల నాటి కాలంలో అరణ్యమయమై ఉన్న ఈ చిన్న కుగ్రామంలో కరువు కాటకాలు, కలరా, మసూచి వ్యాధుల బారిన పడి అనేక మంది మృతి చెందటంతో భయబ్రాంతులకు గురైన స్థానికులు వలసపోవటం ప్రారంభించారని పూర్వీకుల కధనం. గ్రామం వీడటం ఇష్టపడని ఒక రైతు వ్యవసాయం చేస్తుండగా పొలంలో నాగలి చిక్కుకుపోవటంతో అమ్మవారి ప్రతిమ బయిటపడిందని వినికిడి. దీంతో అక్కడ అమ్మవారి ఆలయం నిర్మించినట్లు చేబుతారు. అప్పటి నుంచి మాలి కుటుంబీకులు ఆలయ అర్చకులుగా కొనసాగుతున్నారు.

నాటి స్వేచ్చాపురమే నేటి ఇచ్చాపురం : గ్రామా దేవత స్వేచ్చావతి అమ్మవారి పేరే పరిణామ క్రమంలో ఇచ్చాపురంగా మారిందని పూర్వీకుల ఉవాచ. ఉత్కళ కళింగ రాజ్యంలో ఒడిస్సా గంజాం పరిధిలో గల ఈ గ్రామ పేరులో ఉన్న స్వేచ్చ అనే పదానికి ఒడియాలో ఇచ్చగా సంబోదిస్తారు. దీంతో గ్రామా ఇస్టదైవం స్వేచ్చావతి పేరు మీదున్న స్వేచ్చాపురం కాలక్రమేనా ఇచ్చాపురంగా మార్పు చెందిందని ప్రచారంలో ఉంది.

సంబరాలు.. విశేషాలు... : గత 1977వ సంవత్సరం ఏప్రెల్ నెలలో నిర్వహించిన సంబరాలు ఏకధాటిగా 35 రోజులపాటు జరిగాయి. 24 ఏళ్ల అనంతరం 2001 మే నెల ౩౦వ తేదిన ప్రారంబించిన సంబరాలు 29 రోజులపాటు జరిగాయి. 2013 ఏప్రెల్ 22వ తేదీనుంచి నిర్వహించిన సంబరాలు ఏకధాటిగా 29రోజులపాటు కొనసాగాయి.